"Ang Agalon Nagpakighusay sa Iya mga Suloguon"

Liturhiya sang Pulong

(Sabado, Agosto 31, 2019)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Tesalonica 4:9-11

   Wala na sing kinahanglan nga sulatan pa kamo nahanungod sa paghigugma sa pareho ninyo nga mga tumoluo. Kay kamo gid gintudloan sang Dios sa paghigugmaanay. Kag amo gid ini ang inyo pagsinalayo upod sa tanan nga mga kautoran sa bug-os nga Macedonia. Gani nagapakiluoy kami sa inyo, mga utod, nga ang inyo paghigugma magdugang pa gid. Magtinguha kamo sa pagkabuhi sing malinong, nga nagahimo sang inyo kaugalingon nga bulohaton, kag nagapangabudlay para sa inyo kaugalingon nga palangabuhian, subong sang ginsiling namon sadto sa inyo. 

Salmo sa Pagsabat:

Mga Salmo 98:1, 7-8, 9

(S) Ang Ginoo nagakari sa paggahom sa duta!

Magkanta sing bag-o nga ambahanon sa Ginoo kay nakahimo sia sang makatilingala nga mga butang! Paagi sa iya kaugalingon nga gahom kag balaan nga kusog, nagdaog sia. (S)

Magdaguhob ka, O dagat, kag tanan nga tinuga nga yara sa imo; magkanta ka, O duta, kag tanan nga nagapuyo dira sa imo! Magpamalakpak kamo, O mga kadagatan; O mga kabakuloran, magkanta kamo sing tingob sa kalipay sa atubangan sang Ginoo. (S)

Kay nagakari sia sa paggahom sa duta! Pagagamhan niya ang tanan nga katawuhan sang kalibutan suno sa katarungan kagkamatuoran. (S)

Aleluya:

Juan 13:34

    Ginahatag ko sa inyo ang isa ka bag-o nga sugo: maghigugmaanay kamo. Subong nga ako nagahigugma sa inyo, sa amo man nga bagay dapat kamo maghigugmaanay. 

Ang Pagbasa sang Santos nga Ebanghelyo suno kay:

San Mateo 25:14-30

   “Ang Ginharian sang langit kaangay sang isa ka tawo nga manuglakat sa iban nga lugar. Gintawag niya ang iya mga suloguon kag gintugyan niya sa ila ang iya mga pagkabutang. Ginhatagan niya ang kada isa sa ila suno sa ila ikasarang. Ginhatagan niya ang isa sing P5,000, ang isa sing P2,000, kag ang isa pa gid sing P1,000. Dayon naglakat sia. Ang suloguon nga nakabaton sing P5,000 naglakat kag iya ginpatikang ang iya kuwarta, kag nakaganansya sia sing P5,000. Amo man ang nakabaton sing P2,000, nakaganansya man sia sing P2,000. Pero ang nakabaton sing P1,000 naglakat kag nagkutkot sa duta, kag ginlubong niya ang kuwarta sang iya agalon.

   “Sa tapos ang malawig nga panahon nagbalik ang agalon kag nagpakighusay sa iya mga suloguon. Ang suloguon nga nakabaton sing P5,000 nagsulod kag nagdala sing P5,000. Nagsiling sia, ‘Amoy, ginhatagan mo ako sing P5,000. Yari pa gid ang P5,000 nga akon naganansya.’ Ang iya agalon nagsiling sa iya, ‘Maayo gid, maayo kag matutom nga suloguon! Tungod kay maayo ka magpatikang sang diutay nga kantidad, karon itugyan ko sa imo ang dalagku pa gid nga kantidad. Dali diri kag mag-ambit sang akon kalipay!’ Dayon ang suloguon nga nakabaton sing P2,000 nagsulod kag nagsiling, ‘Amoy, ginhatagan mo ako sing P2,000. Yari pa gid ang P2,000 nga akon naganansya.’ Ang iya agalon nagsiling, ‘Maayo gid, maayo kag matutom nga suloguon! Tungod kay maayo ka magpatikang sang diutay nga kantidad, karon itugyan ko sa imo ang daku nga kantidad. Dali diri kag mag-ambit sang akon kalipay!’ Dayon ang suloguon nga nakabaton sing P1,000 nagsulod kag nagsiling, ‘Amoy, nakahibalo ako nga mabudlay ikaw nga tawo, kay nagaani ka sa wala mo matamni kag nagatipon sang patubas sa wala mo masab-ugi. Hinadlukan ako, gani naglakat ako kag gintago ko ang imo kuwarta sa duta. Yari ang imo kuwarta.’ Ang iya agalon nagsiling, ‘Malain kag matamad ka nga suloguon! Nakahibalo ka gali nga ako nagaani sa wala ko matamni kag nagatipon sang patubas nga wala ko masab-ugi? Ti, kuntani ginpatago mo sa bangko ang akon kuwarta, agod sa akon pagbalik makuha ko ang akon kuwarta upod sang iya saka. Karon, kuhaa ninyo ang kuwarta sa iya kag ihatag sa suloguon nga nakabaton sing P10,000. Kay ang tagsatagsa nga may iya, hatagan pa gid, kag magasulobra ang iya pagkabutang. Pero sia nga wala sing iya, bisan pa ang diutay niya nga pagkabutang kuhaon pa. Nahanungod sa sining walay pulos nga suloguon, ihaboy sia ninyo didto sa kadudolman sa gwa. Didto magahibi sia kag magabagrot sang iya mga ngipon.’ ” 

Agosto 30 | September 1

Ang Buangboang Indi Makasulod sa Langitnon nga Punsyon sang Kasal

Liturhiya sang Pulong

(Biyernes, Agosto 30, 2019)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Tesalonica 4:1-8

   Sa katapusan, mga kautoran, nakatuon kamo sa amon kon ano ang nagakabagay nga pagkabuhi agod mapahamuot ninyo ang Dios. Kon sa bagay amo man ini ang inyo pagkabuhi halin sang una. Kag karon nagapangabay kami kag nagalaygay sa inyo sa ngalan ni Ginoong Jesus, nga mag-uswag kamo sing labi pa. Kay nahibal-an ninyo ang mga sugo nga ginhatag namon sa inyo, paagi sa gahom sang aton Ginoong Jesus. Amo ini ang kabubot-on sang Dios sa inyo: luyag niya nga magbalaan kamo, kag likawan gid ninyo ang pagpakighilawas. Ang tagsa sa inyo nga mga lalaki dapat makahibalo magpangasawa sa balaan kag dungganon nga paagi, indi sa unodnon nga kailigbon, subong sa mga Gentil nga wala makakilala sa Dios. Gani, sa sini nga kaangtanan, wala sing tawo nga magbuhat sing malain sa iya utod ukon magpamintaha sa iya. Ginsilingan namon kamo sini sang una, kag ginpaandaman gid nga ang Ginoo magasilot sa mga nagahimo sini nga mga sala. Ang Dios nagtawag sa aton sa pagkabuhi sing putli kag indi sa pagpakighilawas. Gani ang bisan sin-o nga nagasikway sini nga pagtulon-an wala nagasikway sa tawo, kundi sa Dios nga nagahatag sa inyo sang iya Espiritu Santo. 

Salmo sa Pagsabat:

Mga Salmo 97:1 kag 2, 5-6, 10, 11-12

(S) Magkalipay kamo, tanan nga mga matarong.

Ang Ginoo amo ang hari! Magkalipay ka, O duta! Magkalipay kamo, tanan nga mga isla sang kadagatan! Ang iya ginharian napasad sa katarungan kag hustisya. (S)

Ang mga bakulod nagakatunaw subong sang kandila sa atubangan sang Ginoo, sa atubangan sang Ginoo sang bug-os nga duta. Ang kalangitan nagabantala sang iya pagkamatarong, kag ang tanan nga katawuhan nakakita sang iya himaya. (S)

Ang Ginoo nagahigugma sa mga nagadumot sang malaut; ginaapinan niya ang kabuhi sang iya mga tawo, ginaluwas niya sila sa gahom sang malaut. (S)

Ang kapawa nagasilak sa mga matarong, kag ang kalipay sa maayo nga mga tawo. Magkalipay kamo, tanan nga mga matarong, tungod sang ginhimo sang Ginoo! Dumdoma ang ginhimo sang Balaan nga Dios, kag magpasalamat kamo sa iya! (S)

Aleluya:

Lucas 21:36

    Magbantay kag magpangamuyo kamo pirme agod makatindog kamo sa atubangan sang Anak sang Tawo. 

Ang Pagbasa sang Santos nga Ebanghelyo suno kay:

San Mateo 25:1-13

   “Sa sina nga adlaw ang Ginharian sang langit mapaanggid sa napulo ka mga dalaga nga nagdala sang ila mga suga sa pagsugat sa nobyo. Ang lima sa ila mga buangboang kag ang lima mainandamon. Ang lima nga buangboang nagdala sang ila mga suga ugaling wala sila magbalon sing lana. Ang mga mainandamon nagdala sang ila mga suga kag nagbalon sing lana. Kadugay mag-abot ang nobyo, gani tinuyo ang mga dalaga kag natulogan.

   “Sang tungang gab-i na may nagsinggit, ‘Yari na ang nobyo! Dali kamo kag sugata ninyo sia!’ Ang napulo ka mga dalaga nagmata kag nag-aman sang ila mga suga. Dayon ang mga buangboang nagsiling sa mga mainandamon, ‘Hatagi kami sang inyo lana, kay nagapiraw na ang amon suga.’ Ang mga mainandamon nagsabat, ‘Indi mahimo, kay indi ini makaigo sa inyo kag sa amon. Kadto kamo sa tiyanggi kag magbakal kamo para sa inyo kaugalingon.’ Gani ang mga buangboang naglakat sa pagbakal sang lana, kag sang nakalakat sila amo man ang pag-abot sang nobyo. Ang lima nga nakaaman nag-upod sa iya sa punsyon, kag ginsirahan ang puwertahan.

   “Dugaydogay nag-abot ang iban nga mga dalaga kag nagpanawag, ‘Sir, sir! Pasudla kami!’ Pero ang nobyo nagsabat, ‘Wala ako makakilala sa inyo.’ ”

   Kag si Jesus nagsiling, “Gani magbantay kamo, kay wala kamo makahibalo sang adlaw ukon sang takna.” 

Agosto 29 | Agosto 31

"Nahadlok si Herodes sa kay Juan - ang Matarong kag Balaan nga Tawo"

Liturhiya sang Pulong

(Huwebes, Agosto 29, 2019)

Ang Pagkasakit ni San Juan Bautista, Martir

Ang Pagbasa gikan sa Libro ni:

Jeremias nga Propeta 1:17-19

   Magpakaisog ka! Lakat ka, kag isugid sa ila ang tanan nga akon ginsugo sa imo nga isiling. Karon, indi ka magkahadlok sa ila, kay kon indi, pahadlukon ko pa gid ikaw sa ila atubangan. Pamati ka, Jeremias! Ang tagsatagsa nga nagapuyo sa sining duta--ang mga hari sang Juda, ang mga opisyales, ang mga pari, kag ang mga tawo--magapamatok sa imo. Pero karon nga adlaw, ihatag ko sa imo ang ikasarang sa pagbato sa ila. Manginkaangay ikaw sang isa ka siyudad nga napamakuran sing maayo, sang isa ka haligi nga salsalon, kag sang isa ka pader nga saway. Indi sila makadaog sa imo, kay yari ako sa pag-apin sa imo. Ako, ang GINOO, naghambal sini."

Salmo sa Pagsabat:

Mga Salmo 71:1-2, 3-4, 5-6, 15 kag 17

(S) Magabantala ako sang imo kaayo.

Upod sa imo, O Ginoo, indi ako maano; indi gid pag-itugot nga malutos ako! Tungod kay matarong ka, buligi ako kag tabangi ako! Pamatii ako kag luwasa ako! (S)

Ikaw mangindalangpan ko nga mapag-on, kag malig-on nga pamakod sa pag-apin sa akon, ikaw ang akon dalangpan kag mangangapin. O Dios ko, luwasa ako sa malaut nga mga tawo. (S)

Ang akon paglaom, O Ginoo, yara sa imo, nagsalig ako sa imo halin sang pamatan-on pa ako. Nagsalig ako sa imo sa bug-os ko nga kabuhi, gin-apinan mo ako halin pa sang akon pagkatawo. (S)

Magasugid ako sang imo pagkamatarong, sa bug-os nga adlaw magahambal ako nahanungod sang imo kaluwasan. Gintudloan mo ako halin sang pamatan-on pa ako, kag tubtob karon ginasugid ko ang imo makatilingala nga mga binuhatan. (S)

Aleluya:

Mateo 5:10

    Bulahan ang mga ginahingabot tungod kay ginatuman nila ang ginapaabot sang Dios sa ila, kay ila ang Ginharian sang langit! 

Ang Pagbasa sang Santos nga Ebanghelyo suno kay:

San Marcos 6:17-29

   Si Herodes mismo amo ang nagmando nga ipadakop si Juan, ipagapos kag ipabilanggo. Ginhimo niya ini tungod kay Herodias nga iya ginpangasawa bisan ini sia asawa sang iya utod nga si Felipe. Pirme lang sia ginahambalan ni Juan Bautista, “Indi matarong ang imo pagpangasawa sang asawa sang imo utod!”

   Gani gindumtan ni Herodias si Juan kag gintuyo niya nga patyon, pero indi sia makahimo sini tungod kay Herodes. Nahadlok si Herodes sa kay Juan tungod kay nahibal-an niya nga si Juan matarong kag balaan nga tawo. Gani, gin-apinan niya si Juan nga indi maano. Naluyag sia magpamati kay Juan wala sapayan nga nagakatublag sia sa kada pagpamati niya sa iya.

   Sang ulihi nag-abot gid ang kahigayunan nga ginahulat ni Herodias. Kaadlawan yadto ni Herodes kag naghiwat sia sing isa ka punsyon para sa mataas nga mga punoan sang banwa, mga opisyales sang mga soldado kag lutaw nga mga pumoluyo sang Galilea. Ang anak nga babayi ni Herodias nagsulod kag nagsaot, kag naglingaw sa kay Herodes kag sang iya mga dinapit. Gani ang hari nagsiling sa dalagita, “Pangayo ka sang bisan ano kay ihatag ko sa imo.” Kag nagsiling pa sia, “Ginasumpa ko nga ihatag ko sa imo ang bisan ano nga pangayuon mo, bisan pa ang katunga sang akon ginharian.”

   Tungod sini naggwa ang dalagita kag nagpamangkot sa iya iloy, “Ano bala ang pangayuon ko?”

   Ang iloy nagsabat, “Ang ulo ni Juan Bautista.”

   Gilayon nagdalidali sa pagbalik ang dalagita sa hari kag nagsiling, “Gusto ko nga ihatag mo sa akon sa gilayon ang ulo ni Juan Bautista sa isa ka bandihado!”

   Nagpasubo gid ini sa hari, pero indi na sia makabalibad tungod kay nagpanumpa sia sa atubangan sang iya mga dinapit. Gani ginsugo niya sa gilayon ang isa ka soldado sa pagdala sa iya sang ulo ni Juan. Nagkadto ang soldado sa prisuhan kag ginpugotan si Juan. Kag gindala niya ang ulo nga natungtong sa isa ka bandihado kag ginhatag ini sa dalagita nga amo ang naghatag sini sa iya iloy. Sang mabatian ini sang mga gintuton-an ni Juan, ginkadtuan nila kag ginkuha ang iya bangkay kag ginlubong. 

Agosto 28 | Agosto 30

Ang Matuod nga Katahom kag Kaayo Nagahalin sa Sulod sang Tagipusoon

Liturhiya sang Pulong

(Miyerkules, Agosto 28, 2019)

San Agustin, Obispo kag Doktor sang Simbahan

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Tesalonica 2:9-13

   Mga kautoran, matuod gid nga indi ninyo malipatan kon daw ano ang amon pagpangabudlay kag paghimulat! Nagpangabudlay kami sa adlaw kag gab-i agod nga indi kamo mabug-atan sa pagsakdag sa amon samtang nagwali kami sa inyo sang Maayong Balita gikan sa Dios.

   Mga saksi namon kamo, kag subong man ang Dios: ang amon pagginawi sa tunga ninyo putli, matarong, kag di-salawayon. Nahibal-an ninyo nga ginkabig namon ang tagsatagsa sa inyo subong sang pagkabig sang isa ka amay sa iya mga anak. Ginlaygayan namon kamo nga magmalig-on, ginlipay namon kamo, kag nagpadayon kami sa paglaygay sa inyo sa pagkabuhi suno sa nahamut-an sang Dios, nga nagatawag sa inyo sa pag-ambit sang iya kaugalingon nga Ginharian kag himaya.

   Tungod man sini, nagapasalamat kami sa Dios sa gihapon. Sang pagdala namon sa inyo sang pulong sang Dios, ginpamatian ninyo ini kag ginbaton, indi subong pulong sang tawo, kundi subong pulong sang Dios, nga sa pagkamatuod amo gid man ini. Kay ang Dios nagapanghikot sa inyo nga nagatuo. 

Salmo sa Pagsabat:

Mga Salmo 139:7-8, 9-10, 11-12

(S) O Ginoo, gin-usisa mo ako, kag nakilala mo ako.

Diin bala ako makadto agod makapalagyo sa imo Espiritu? Diin ako makadto agod makapalayo sa imo atubangan? Kon magsaka ako sa langit, didto ikaw; kon maghigda ako sa duog sang mga patay didto man ikaw. (S)

Kon maglupad ako sa unhan sang sidlangan, ukon magpuyo sa pinakalayo nga duog sa nakatundan, didto ikaw sa pagtuytoy sa akon, didto ikaw sa pagbulig sa akon. (S)

Mapangayo ko ang kadudolman sa pagtago sa akon, ukon ang kapawa sa palibot nakon nga magmangingab-i, pero bisan ang kadudolman indi madulom para sa imo, kag ang kagab-ihon subong kasanag sang adlaw. (S)

Aleluya:

1 Juan 2:5

    Ang nagatuman sang pulong sang Dios, amo ang tawo nga ang iya gugma sa Dios nahimpit.

Ang Pagbasa sang Santos nga Ebanghelyo suno kay:

San Mateo 23:27-32

   “Kailo man kamo, mga manunodlo sang Kasugoan, kag mga Fariseo! Mga salimpapaw! Kaangay kamo sang mga lulobngan nga ginpintahan sing puti kag matahom tan-awon sa gwa, pero puno sang tul-an sang mga patay kag sang kagarukan sa sulod. Kamo amo man! Kon tan-awon kamo sang mga tawo daw sa matarong kamo, pero ang sa sulod ninyo puno sang mga kabutigan kag kalautan.”

   “Kailo man kamo, mga manunodlo sang Kasugoan kag mga Fariseo! Mga salimpapaw! Nagahimo kamo sing matahom nga mga lulobngan para sa mga propeta kag nagapuni sang pantyon sang mga matarong, kag nagasiling kamo, ‘Kon kita nagkabuhi sa mga panahon sang aton mga ginikanan, wala kuntani kita maghimo sang ila ginhimo kag magpatay sang mga propeta.’ Kon amo ginaako ninyo nga kamo mga kaliwat sang nagpatay sang mga propeta! Hala, padayuna ninyo kag tapusa ang ila ginsugoran!

Agosto 27 | Agosto 29

Indi Pagpatumbayai ang Katarungan, Kaluoy kag Pagtuo

Liturhiya sang Pulong

(Martes, Agosto 27, 2019)

Santa Monica

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Tesalonica 2:1-8

   Mga kautoran, kamo gid nakahibalo nga ang amon pagduaw sa inyo indi kapaslawan. Nakahibalo kamo kon daw ano ang pagpaantos kag pagpakahuya sa amon sa Filipos sa wala pa kami makakadto sa inyo sa Tesalonica. Pero ang aton Dios naghatag sa amon sing kaisog sa pagsugid sa inyo sang Maayong Balita nga nagahalin sa iya, bisan pa nga may madamo nga mga pagpamatok. Kay ang amon laygay sa inyo wala nagagikan sa sayop ukon sa malain nga mga tinutoyo, ukon sa daya. Sa baylo, nagahambal kami sa gihapon suno sa luyag sang Dios, kay ginpakamaayo kami sang Dios kag gintugyanan sang Maayong Balita. Wala kami nagapahamuot sa tawo, kundi sa Dios nga amo ang nagatilaw sang amon mga tinutoyo. Kay nahibaluan gid ninyo nga wala kami naggamit sang mga pulong sa pagdayawdayaw sa inyo, ukon sa pagtabuntabon sang amon pagkahakog. Ang Dios amo ang amon saksi! Wala kami nagapangita nga ang mga tawo magpadungog sa amon, bisan kamo ukon ang iban, bisan pa nga makapaabot kuntani kami sini sa inyo subong nga mga apostoles ni Cristo. Sa baylo, malulo kami sang kaupod pa kami ninyo, subong sang kalulo sang isa ka iloy nga nagabatiti sa iya mga anak. Tungod sang amon gugma sa inyo, handa kami sa pagpaambit sa inyo indi lamang sang Maayong Balita gikan sa Dios, kundi bisan pa sang amon kabuhi. Mahal gid kamo sa amon!

Salmo sa Pagsabat:

Mga Salmo 139:1-3, 4-6

(S) O Ginoo, gin-usisa mo ako, kag nakilala mo ako.

O Ginoo, gin-usisa mo ako, kagnakilala mo ako. Nahibaluan mo ang tanan nga ginahimo ko; gikan sa malayo nahangpan mo ang akon mga panghunahona. Makita mo ako, bisan nagaobra ukon nagapahuway ako, nahibaluan mo ang tanan ko nga mga ginahimo. (S)

Bisan sa wala pa ako makahambal nahibaluan mo na ang akon inugsiling. Yari ka sa palibot ko, sa atubangan, sa likod, sa kilid; ginaapinan mo ako sang imo gahom. Ang imo nahibaluan nahanungod sa akon tama ka makatilingala, tama ini kadalom para sa akon paghangop. (S)

Aleluya:

Hebreo 4:12

    Ang pulong sang Dios buhi kag gamhanan, nga nagatungkad sang mga panghunahona kag mga handom sang tagipusoon sang mga tawo. 

Ang Pagbasa sang Santos nga Ebanghelyo suno kay:

San Mateo 23:23-26

   “Kailo man kamo, mga manunodlo sang Kasugoan kag mga Fariseo! Mga salimpapaw! Nagahatag kamo sa Dios sang ikanapulo nga bahin bisan sang panakot subong sang tanglad, sang sibuyas, sang luy-a, pero ginapatumbayaan ninyo ang labing importante nga mga ginatudlo sang Kasugoan, nga amo ang katarungan, kaluoy kag pagtuo. Amo ini ang inyo dapat buhaton, nga wala nagapatumbaya sang iban. Bulag nga mga manugtoytoy! Ginasala ninyo ang mga sapatsapat sa inyo ilimnon, pero ginahalunhon ninyo ang kamelyo!

   “Kailo man kamo, mga manunodlo sang Kasugoan kag mga Fariseo! Mga salimpapaw! Ginatinluan ninyo ang sa gwa sang baso kag sang pinggan, pero ang sulod sini puno sang mga butang nga inyo nakuha paagi sa palugos kag kahakog. Mga Fariseo nga bulag! Tinloi anay ang sulod sang baso, kag ang sa gwa magatinlo man. 

Agosto 26 | Agosto 28

Indi Pag-isara ang Puwertahan para sa Ginharian sang Dios

Liturhiya sang Pulong

(Lunes, Agosto 26, 2019)

Ang Pagbasa gikan sa Nahauna nga Sulat ni San Pablo nga Apostol, sa mga:

Taga-Tesalonica 1:1-5, 8-10

   Pag-abiabi halin kay Pablo, kay Silas, kag kay Timoteo— Sa mga katapo sang iglesia sa Tesalonica, nga iya sang Dios nga Amay kag ni Ginoong Jesu-Cristo. 
   Kabay nga ang grasya kag paghidait manginyara sa inyo.

   Nagapasalamat kami sa gihapon sa Dios tungod sa inyo tanan, kag ginasambit namon kamo sa gihapon sa amon mga pangamuyo. Kay ginadumdom namon sa atubangan sang aton Dios kag Amay kon daw ano ang pagbutang ninyo sa buhat sang inyo pagtuo, kon daw ano ang pagtulod sang inyo gugma sa inyo sa pagpangabudlay sing tudotudo, kag kon daw ano kalig-on sang inyo paglaom sa aton Ginoong Jesu-Cristo. Nakahibalo kami, mga kautoran, nga ang Dios nagahigugma sa inyo kag nagpili sa inyo nga mangin-iya. Kay gindala namon ang Maayong Balita sa inyo, indi lamang sa mga pulong, kundi sa gahom man kag sa Espiritu Santo, kag sa bug-os nga pagsalig sa iya kamatuoran. Nakahibalo kamo sang amon pagginawi sang kaupod pa kami ninyo, kay yadto para sa inyo kaayuhan. Kay ang mensahi nahanungod sa Ginoo naglapnag halin sa inyo indi lamang sa Macedonia kag sa Grecia, kundi nga sa bisan diin nga duog ang balita sang inyo pagtuo sa Dios naglapnag. Gani wala na sing kinahanglan nga maghambal pa kami. Tanan yadto nga mga tawo nagasugid kon daw ano ang pagbaton ninyo sa amon, sang pagduaw namon dira sa inyo, kag kon daw ano ang pagbiya ninyo sa mga diosdios. Karon nagaalagad kamo sa matuod kag buhi nga Dios, kag nagahulat sa iya Anak nga magakari gikan sa langit, ang iya Anak nga si Jesus nga iya ginbanhaw sa mga minatay, kag magaluwas sa aton sa kaakig sang Dios nga magaabot.

Salmo sa Pagsabat:

Mga Salmo 149:1-2, 3-4, 5-6 kag 9

(S) Ang Ginoo nagakalipay sa iya mga tawo.

Magkanta sing bag-o nga ambahanon sa Ginoo, dayawa ninyo sia sa pagtilipon sang iya matutom nga mga tawo! Magkasadya ka, O Israel, tungod sang imo manunoga; maghinugyaw kamo, O mga pumoluyo sang Sion, tungod sang inyo hari! (S)

Dayawa ninyo nga may pagsinaut ang iya ngalan; magtukar kamo sing mga bumbo kag mga arpa sa pagdayaw sa iya. Ang Ginoo nagakalipay sa iya mga tawo; ginapadunggan niya ang mga mapainuboson sing pagdaog. (S)

Maghinugyaw ang mga tawo sang Dios sa ila pagdaog, kag mag-amba sing masinadyahon sa ila mga piesta. Magsinggit sila sing mabaskog sa ila pagdayaw sa Dios, Amo ini ang pagdaog sang mga tawo sang Dios! (S)

Aleluya:

Juan 10:27

    Ang akon mga karnero nagapamati sa akon tingog, siling sang Ginoo; Kilala ko sila kag nagasunod sila sa akon.

Ang Pagbasa sang Santos nga Ebanghelyo suno kay:

San Mateo 23:13-22

   “Kailo man kamo, mga manunodlo sang Kasugoan kag mga Fariseo! Mga salimpapaw! Ginatakpan ninyo ang puwertahan sang Ginharian sang langit sa mga tawo, pero kamo inyo wala nagasulod kag ginabalabagan pa ninyo ang nagatinguha sa pagsulod!

   “Kailo man kamo, mga manunodlo sang Kasugoan kag mga Fariseo! Mga salimpapaw! Nagapamintaha kamo sa mga balo nga babayi paagi sa pagkuha sang ila mga pagkabutang kag dayon ginatabuntabonan lang ninyo ang inyo hinimuan paagi sa malawig ninyo nga mga pagpangamuyo! Tungod sini labi pa gid ang inyo silot! “Kailo man kamo, mga manunodlo sang Kasugoan kag mga Fariseo! Mga salimpapaw! Ginatabok ninyo ang kadagatan kag ginalatas ang mga kadutaan sa pagkonbertir sang isa ka tawo, kag kon makonbertir na gani ninyo sia, ginahimo ninyo nga doble pa kalain sang sa inyo nga bagay sa impiyerno! “Kailo man kamo, mga bulag nga manugtoytoy! Nagatudlo kamo, ‘Kon ang tawo magsumpa sa templo, indi kinahanglan nga tumanon niya ang iya sumpa. Pero kon magsumpa sia sa bulawan nga yara sa templo, kinahanglan tumanon niya ang iya sumpa.’ Buangboang nga mga bulag! Diin bala ang pasulabihon, ang bulawan ukon ang templo nga nagapabalaan sang bulawan?

   Nagatudlo man kamo, ‘Kon ang tawo magsumpa sa altar, indi kinahanglan nga tumanon niya ang iya sumpa, pero kon magsumpa sia sa dulot nga yara sa ibabaw sang altar, kinahanglan tumanon niya ang iya sumpa.’ Mga bulag gid kamo! Diin bala ang pasulabihon, ang dulot ukon ang altar nga nagapabalaan sang dulot? Gani kon ang tawo magsumpa sa altar, nagasumpa sia sa altar kag sa tanan nga dulot nga yara sa altar. Kag kon ang tawo magasumpa sa templo, nagasumpa sia sa templo kag sa Dios nga nagapuyo didto. Kag kon ang tawo magsumpa sa langit nagasumpa sia sa trono sang Dios kag sa iya nga nagalingkod didto. 

Agosto 25 | Agosto 27

Ang Makitid nga Puwertahan

Liturhiya sang Pulong

(Domingo, Agosto 25, 2019)

1. Ang Pagbasa gikan sa Libro ni:

Isaias nga Propeta 66:18-21

   Nahibal-an ko ang ila mga hunahona kag mga binuhatan.
   "Magakari ako sa pagpatipon sang mga katawuhan sang tanan nga mga kapungsoran. Kon magtipon sila, makita nila kon ano ang mahimo sang akon gahom, kag mahibaluan nila nga ako ang nagasilot sa ila. Pero ang iban sa ila ipadala ko sa mga pungsod kag sa malayo nga mga kadutaan nga wala pa makabati sang akon pagkagamhanan kag kusog. Ipadala ko sila sa España, sa Libya, kag sa Lidya upod sa ila matanda nga manugpana, kag sa Tubal kag sa Gresya. Isugid nila sa sini nga mga pungsod ang akon pagkagamhanan. Pagadalhon nila pabalik ang tanan ninyo nga mga kasimanwa halin sa mga pungsod subong isa ka regalo sa akon. Pagadalhon nila sila nga nagasakay sa mga kabayo, sa mga mula, sa mga kamelyo, sa mga karuwahi sa inaway kag mga karo, sa akon balaan nga bukid sa Jerusalem, subong nga ang mga Israelinhon nagadala sing halad nga kalan-on sa Templo sa natinluan nga mga sulodlan. Himuon ko ang iban sa ila nga mga pari kag mga Levita.   

Salmo sa Pagsabat:

Mga Salmo 117:1, 2

(S) Lakat kamo sa bug-os nga kalibutan sa pagbantala sang Maayong Balita.

Dayawa ninyo ang Ginoo, tanan nga mga kapungsoran! Dayawa ninyo siya, tanan nga mga katawuhan! (S) 

Ang iya mapinadayunon nga gugma para sa aton malig-on, kag ang iya katutom wala sing katapusan. (S)

2. Ang Pagbasa gikan sa Sulat sa mga:

Hebreo 12:5-7, 11-13

   Nalimtan bala ninyo ang mga laygay nga ginhambal sang Dios sa inyo subong iya mga anak?
   “Anak ko,
   Magpamati ka
   Kon ang Ginoo magdisiplina sa imo,
   Kag indi ka magpakaluya
   Kon sia magsabdong sa imo.
   Kay ang Ginoo nagadisiplina
   Sang tagsatagsa nga iya ginahigugma,
   Kag nagasilot sang tagsatagsa
   Nga ginabaton niya subong anak.”

   Batasa ang inyo ginaantos subong isa ka pagdisiplina sang isa ka amay. Kay ang inyo pag-antos nagapakita nga ang Dios nagakabig sa inyo nga iya mga anak. May anak bala nga wala ginadisiplina sang iya amay?

   Sa tion nga ginadisiplina kita, ang hunahona naton nga ginahatagan kita sing kalisod kag indi kalipay. Pero sa ulihi, ang mga gindisiplina paagi sa mga silot nagaagom sing mahidaiton nga bunga sang isa ka matarong nga kabuhi. Gani ibayaw ang inyo ginakapoy nga mga kamot, kag pabakura ang inyo maluya nga mga tuhod! Padayuna ang paglakat sa matadlong nga mga dalan, agod nga ang piang nga tiil indi magliw-as, kundi nga mag-ayo.

Aleluya:

Juan 14:6

    "Ako amo ang dalan, ang kamatuoran, kag ang kabuhi; wala sing may makakadto sa Amay kon indi paagi sa akon."

Ang Pagbasa sang Santos nga Ebanghelyo suno kay:

San Lucas 13:22-30

   Samtang nagapakadto si Jesus sa Jerusalem nagpanudlo sia sa mga baryo kag mga banwa nga iya gin-agihan. Karon may nagpamangkot sa iya, “Sir, diutay lang bala ang maluwas?” Si Jesus nagsabat sa ila, “Magtinguha kamo sa pagsulod sa makitid nga puwertahan. Kay nagasiling ako sa inyo nga madamo ang magatinguha sa pagsulod, pero indi makasulod. Ang pangulo sang balay magabangon kag magapanira sang puwertahan. Ti, kon didto pa kamo sa gwa kag magapanuktok kamo sa puwertahan kag magsiling, ‘Sir, abrihi kami!’ magasabat sia sa inyo, ‘Wala ako makahibalo kon taga-diin kamo.’ Ti, magasabat kamo, ‘Nagkaon kag nag-inom kami upod sa imo kag nagpanudlo ka sa amon banwa.’ Magasiling sia liwat, ‘Wala ako makahibalo kon taga-diin kamo. Palayo kamo sa akon, tanan kamo nga manugbuhat sang kalautan!’ Daw ano ang paghinibi kag pagbinagrot sang mga ngipon, kon makita ninyo si Abraham, si Isaac, kag si Jacob kag ang tanan nga mga propeta sa Ginharian sang Dios, samtang kamo inyo wala pagpasudla. May mga tawo nga magaabot halin sa sidlangan kag nakatundan, halin sa aminhan kag bagatnan, kag magapungko sa pagkaon sa punsyon sa Ginharian sang Dios. Ti, may mga naulihi karon nga mauna, kag may mga nauna karon nga maulihi.” 

Agosto 24 | Agosto 26

"Kari ka kag Tan-awa"

Liturhiya sang Pulong

(Sabado, Agosto 24, 2019)

San Bartolome, Apostol

Ang Pagbasa gikan sa Libro sang:

Bugna kay San Juan 21:9-14

   Ang isa sang pito ka mga anghel nga may pito ka mga yahong nga puno sang pito ka katapusan nga mga kalalat-an nagpalapit sa akon kag nagsiling, “Kari ka, kag ipakita ko sa imo ang Nobya, ang asawa sang Cordero.” Gingamhan ako sang Espiritu, kag gindala ako sang anghel sa putokputokan sang mataas kaayo nga bukid. Ginpakita niya sa akon ang Jerusalem, ang Balaan nga Siyudad, nga nagapanaog halin sa langit gikan sa Dios, nga nagabanaag sang himaya sang Dios. Ang siyudad nagabanaag subong sang malahalon nga bato, kaangay sang haspe, nga matin-aw subong sang kristal. Ginalibutan ini sang daku kag mataas nga pader, nga may 12 ka mga puwerta, kag ginabantayan sang ka mga anghel. Sa mga puwerta nasulat ang mga ngalan sang 12 ka mga tribo sang Israel. May tatlo ka mga puwerta sa tagsa ka kilid: tatlo sa sidlangan, tatlo sa nabagatnan, tatlo sa aminhan, kag tatlo sa nakatundan. Ang pader sang siyudad napasad sa 12 ka mga bato, nga nasulatan sang mga ngalan sang 12 ka mga apostoles sang Cordero. 

Salmo sa Pagsabat:

Mga Salmo 145:10-11, 12-13, 17-18

(S) Ang tanan mo nga mga Santos, O Ginoo, makahibalo sang mahimayaon nga pagkahalangdon sang imo ginharian.

Ang tanan mo nga mga tinuga, O Ginoo, magadayaw sa imo, kag ang imo mga tawo magapasalamat sa imo! Magahambal sila sang himaya sang imo ginharian, kag magasugid sila sang imo gahom. (S)

Ang tanan nga mga tawo makahibalo sang imo gamhanan nga mga buhat, kag sang mahimayaon nga pagkahalangdon sang imo ginharian. Ang imo ginharian wala sing katapusan, kag ikaw hari sa walay katubtoban. (S)

Ang Ginoo matarong sa tanan nga iya ginahimo, maluloy-on sa tanan niya nga mga buhat. Malapit sia sa tanan nga nagapanawag sa iya, nga nagapanawag sa iya sing maminatud-on. (S)

Aleluya:

Juan 1:49

    Manunodlo, ikaw amo ang Anak sang Dios! Ikaw amo ang Hari sang Israel!

Ang Pagbasa sang Santos nga Ebanghelyo suno kay:

San Juan 1:45-51

   Gani, ginpangita ni Felipe si Natanael, kag ginsugiran sia, “Nakita namon ang tawo nga nahanungod sa iya si Moises nagsulat sa libro sang Kasugoan, kag ang mga propeta nagsulat man nahanungod sa iya. Sia amo si Jesus nga anak ni Jose nga taga-Nazaret.”

   Si Natanael nagpamangkot, “May maayo bala nga butang nga makagikan sa Nazaret?” 

   Si Felipe nagsabat, “Kari ka kag tan-awa.”

   Sang makita ni Jesus si Natanael nga nagapakadto sa iya nagsiling sia nahanungod kay Natanael, “Yari ang isa ka matuodtuod nga Israelinhon; waay sing limbong sa iya!”

   Si Natanael nagpamangkot sa iya, “Paano mo ako nakilala?” 

   Si Jesus nagsabat, “Nakita ko na ikaw didto sa idalom sang kahoy nga higera, sa wala pa ikaw gintawag ni Felipe.”

   Nagsabat si Natanael, “Manunodlo, ikaw amo ang Anak sang Dios! Ikaw amo ang Hari sang Israel!”

   Nagsiling si Jesus, “Nagatuo bala ikaw tungod kay nagsiling ako sa imo nga nakita ko ikaw sang didto ikaw sa idalom sang kahoy nga higera? Dalagku pa gid sini nga mga butang ang imo makita!” Kag si Jesus nagsiling sa ila, “Matuod gid, makita ninyo ang langit nga nabuksan kag ang mga anghel sang Dios nga nagasakapanaog sa ibabaw sang Anak sang Tawo!”

Agosto 23 | Agosto 25

Ano ang Labing Daku nga Kasugoan sang Kabuhi?

Liturhiya sang Pulong

(Biyernes, Agosto 23, 2019)

Santa Rosa de Lima, Birhen

Ang Pagbasa gikan sa Libro ni:

Rut 1:1, 3-6, 14-16, 22

   Sa panahon nga ang Israel wala pa sing hari, may tiggulotom nga nag-abot sa pungsod. Gani ang isa ka tawo nga taga-Betlehem nga sakop sang Juda nagdala sang iya asawa kag duha ka anak nga lalaki sa Moab sa pagpuyo didto sing pila ka tuig. Si Elimelec napatay, kag si Noemi na lang kag ang iya duha ka anak ang nabilin. Nagpangasawa sila sang mga dalaga nga taga-Moab nga ang isa ginahingalanan kay Orpa kag ang isa kay Rut. Sa tapos nakapuyo sila didto sing napulo ka tuig, si Mahalon kag si Quelion napatay man, kag si Noemi isahanon na lang nga wala na sing bana ukon kabataan. Samtang didto pa sila sa Moab, si Noemi nakabati nga ang GINOO naghatag sing maayo nga patubas sa iya mga tawo. Gani, nagpanghimos sia sa paghalin sa Moab upod sa iya mga umagad nga babayi. Sa liwat naghibi sila. Dayon si Orpa naghalok sa iya ugangan sa pagpaalam sa iya kag naglakat sa pagpauli, pero si Rut indi maghalin. Gani si Noemi nagsiling sa iya, “Rut, ang imo bilas nagbalik sa iya mga kasimanwa kag sa iya dios. Pauli ka upod sa iya.” 
   Pero si Rut nagsabat, “Indi ako pagpilita sa pagbiya sa imo. Paupda ako sa imo. Maupod ako bisan diin ka makadto; bisan diin ka magpuyo didto man ako magapuyo. Ang imo mga tawo mangin-akon nga tawo, kag ang imo Dios mangin-akon Dios.

   Gani, amo ini ang pagbalik ni Noemi halin sa Moab nga upod si Rut, ang iya umagad nga babayi nga taga-Moab. Sang pag-abot nila sa Bethlehem nagasugod gid ang tig-alani sang sebada.

Salmo sa Pagsabat:

Mga Salmo 146:5-6, 6-7, 8-9, 9-10

(S) Dayawon ko ang Ginoo samtang nagakabuhi pa ako.

Bulahan ang tawo nga ginabuligan sang Dios ni Jacob, kag nagasalig sia sa Ginoo nga iya Dios, nga nagtuga sang langit, duta, kag dagat, kag sang tanan nga yara sa ila. (S)

Ginatuman gid niya sa gihapon ang iya mga saad; nagahukom sia pabor sa mga ginapigos, kag nagahatag sia sing kalan-on sa mga ginagutom. Ang Ginoo nagahilway sang mga binilanggo. (S)

Kag nagaayo sang mga bulag. Ginabayaw niya ang mga ginapaubos, ginahigugma niya ang iya matarong nga mga tawo. Ginaapinan niya ang mga dumoluong nga nagapuyo sa duta. (S)

Ginabuligan niya ang mga balo nga babayi kag mga ilo, pero ginaguba niya ang mga plano sang mga malaut. Ang Ginoo magahari sa walay katubtoban! Ang imo Dios, O Sion, magagahom sa tanan nga panahon! (S)

Aleluya:

Mga Salmo 25:4, 5

    Tudloi ako sang imo mga dalan, O Ginoo, tudloi ako sa pagkabuhi suno sa imo kamatuoran.

Ang Pagbasa sang Santos nga Ebanghelyo suno kay:

San Mateo 22:34-40

   Sang pagkabati sang mga Fariseo nga ang mga Saduceo wala makasabat kay Jesus, nagtipon sila, kag ang isa sa ila nga manunodlo sang Kasugoan, nagdakupdakop sa iya paagi sa isa ka pamangkot, “Manunodlo, ano bala ang labing daku nga sugo sa Kasugoan?”

   Si Jesus nagsabat, “ ‘Higugmaa ang Ginoo nga imo Dios sa bug-os mo nga tagipusoon, sa bug-os mo nga kalag, kag sa bug-os mo nga hunahona.’ Amo ini ang labing daku kag ang labing importante nga sugo. Ang ikaduha kaangay man sini, ‘Higugmaa ang imo isigkatawo subong sang imo kaugalingon.’ Sa sining duha ka mga sugo napasad ang bug-os nga Kasugoan nga ginsulat ni Moises kag ang mga pagtulon-an sang mga propeta.” 

Agosto 22 | Agosto 24

Ang mga Inagda Indi Magkadto sa Punsyon!

Liturhiya sang Pulong

(Huwebes, Agosto 22, 2019)

Ang Mahal nga Birhen Maria nga Reyna

Ang Pagbasa gikan sa Libro sang:

Mga Hukom 11:29-39

   Dayon gingamhan si Jepte sang espiritu sang Ginoo. Nag-agi sia sa Galaad kag sa Manases, kag nagbalik sia sa Mispa sa Galaad. Halin didto nagkadto sia sa Amon. Nagsaad si Jepte sa Ginoo nga nagasiling, "Kon padag-on mo ako batok sa mga Amonhon, igahalad ko subong nga halad nga sinunog ang nahauna nga tawo nga maggwa sa akon balay sa pagsugata sa akon, sa pag-abot ko halin sa akon pagdaog. Igahalad ko ina nga tawo sa imo subong halad nga sinunog.” Gani nagtabok si Jepte sa suba sa pagpakig-away sa mga Amonhon, kag ginpadaog sia sang GINOO. Ginsalakay niya sila halin sa Aroer tubtob sa mga kadutaan sa palibot sang Minit, duha ka pulo ka mga siyudad tanan, tubtob sa sapa sang Keramin. Madamo ang mga nagkalamatay, kag nalutos sang mga Israelinhon ang mga Amonhon.

   Sang pagbalik ni Jepte pauli sa Mispa, ang iya anak nga babayi naggwa sa pagsugata sa iya nga nagasaot kag nagatukar sang diutay nga tambor. Bugtong sia nga anak ni Jepte. Wala na si Jepte sing iban pa nga anak nga lalaki ukon babayi. Sang pagkakita niya sang iya anak nga babayi, gingisi ni Jepte ang iya kaugalingon nga bayu tungod sa kasubo, kag nagsiling, "Abaw, anak ko! Ginabuong mo ang akon tagipusoon! Ngaa bala nga ikaw pa ang magpakalisod sa akon? Nakapanumpa na ako sa GINOO, kag indi ko na ini mabawi!" Nagsiling ang anak nga babayi ni Jepte sa iya, "Kon nakapanumpa na ikaw sa Ginoo, tumana ang imo ginsumpa nga pagahimuon sa akon. Ang Ginoo naghatag sa imo sing pagtimalos sa imo mga kaaway nga mga Amonhon." Pero nagsiling sia sa iya amay, "Amo lang ini ang akon ginapangayo: pabay-i lang ako sa sulod sang duha ka bulan, agod makaupod ako sa akon mga abyan pakadto sa mga kabukiran sa pagpangasubo, tungod kay dapat ako mapatay nga isa ka ulay.” Gintugotan sia ni Jepte sa paglakat, kag nagpalayo sia sa kay Jepte sa sulod sang duha ka bulan. Sia kag ang iya mga abyan nagkadto sa mga kabukiran, kag nagpangasubo tungod kay mapatay sia nga isa ka ulay. Sa tapos sang duha ka bulan nagbalik sia sa iya amay.

Salmo sa Pagsabat:

Mga Salmo 40:5, 7-8, 8-9, 10

(S) Yari ako, O Ginoo, sa pagtuman sang imo kabubot-on.

O Ginoo nga akon Dios, madamo ang imo nahimo para sa amon; wala na sing pareho sa imo! Madamo kag makatilingala ang imo mga plano para sa amon. Kon isaysay ko sila tanan, madamo pa sila sang sa akon sarang masugid. (S)

Gani nagsabat ako, “Yari ako! Ang imo mga mando para sa akon yara sa libro sang Kasugoan. Daw ano ang kaluyag ko sa pagtuman sang imo kabubot-on, O Dios ko! (S)

Ginahuptan ko ang imo pagtulon-an sa akon tagipusoon.” Sa mga pagtililipon sang tanan nimo nga mga tawo, O Ginoo, ginasugid ko ang maayong balita nga ikaw nagaluwas. Ikaw nakahibalo nga indi ako mag-untat sa pagsugid sini. (S)

Wala ko gintago ang balita sang kaluwasan sa akon kaugalingon; ang imo pagkamatutom kag pagbulig ginasugid ko sa gihapon. Sa pagtililipon sang tanan nimo nga mga tawo, wala ako maghipos nahanungod sang imo mapinadayunon nga gugma kag pagkamainunongon. (S)

Aleluya:

Mga Salmo 95:8

    Pamatii ninyo ang ginasiling sang Ginoo: "Indi kamo magpakatig-a subong sang inyo tagipusoon."

Ang Pagbasa sang Santos nga Ebanghelyo suno kay:

San Mateo 22:1-14

   Si Jesus naghambal liwat sa mga tawo paagi sa mga palaanggiran. “Ang Ginharian sang langit kaangay sa isa ka hari nga naghanda sang isa ka punsyon sa kasal sang iya anak. Ginpadala niya ang iya mga suloguon sa pagtawag sang mga inagda sa punsyon, pero ang mga inagda indi magkadto. Gani ginsugo niya ang iban niya nga mga suloguon kag ginsingganan, ‘Singgana ninyo ang mga inagda nga ang akon punsyon handa na, ang akon mga baka kag mga tinday nga pinatambok naihaw na, kag ang tanan handa na. Gani kari kamo kag mamunsyon!’ Pero ang mga inagda wala magsapak kundi naglakat sila: ang isa sa iya uma, ang isa sa iya baligyaan, samtang ang iban nga mga inagda nagdakop, nagbunal, kag nagpatay sa mga suloguon. Ang hari naakig gid, kag ginpadala niya ang iya mga soldado sa pagpamatay sa mga nagpatay sang iya suloguon, kag sa pagsunog sang ila banwa. Dayon gintawag niya ang iya mga suloguon kag ginsingganan, ‘Ang akon punsyon sa kasal handa na, ugaling ang mga inagda indi takos. Karon kadto kamo sa mga dalan kag agdaha ninyo sa punsyon ang tanan nga inyo masugata.’ Gani ang mga suloguon nagkadto sa mga dalan kag gintipon nila ang tanan nga ila nakita, malain kag maayo. Kag ang kalan-an sa punsyon napuno sang mga inagda.

   “Nagsulod ang hari sa pagtan-aw sang mga inagda, kag nakita niya ang isa ka tawo nga wala makasuksok sang bayu para sa punsyon. Ginpamangkot sia sang hari, ‘Abyan, ngaa nga nakasulod ka diri nga wala makasuksok sang bayu para sa punsyon?’ Pero wala sia magsabat. Dayon ang hari nagsugo sa mga suloguon, ‘Gapusa ninyo ang iya kamot kag tiil kag ihaboy sa kadudolman sa gwa. Didto magahibi sia kag magabagrot sang iya mga ngipon.’”

   Kag sa katapusan si Jesus nagsiling, “Kay madamo ang mga gin-agda, pero pila lamang ang mga ginpili.” 

Agosto 21 | Agosto 23

"Ginakahisaan mo bala ang Akon nga Pagkamaalwan?"

Liturhiya sang Pulong

(Miyerkules, Agosto 21, 2019)

San Pio X, Santo Papa

Ang Pagbasa gikan sa Libro sang:

Mga Hukom 9:6-15

   Dayon ang tanan nga mga tawo sang Sikem kag Betmilo nagtipon sing tingob, kag nagkadto sa balaan nga kahoy nga terebinto sa Sikem, sa diin ginhimo nila si Abimelec nga hari.

   Sang pagkabati ni Jotam nahanungod sini, nagkadto sia kag nagtindog sa putokputokan sang Bukid sang Gerisim, kag nagsinggit sa ila, "Mga taga-Sikem, pamatii ninyo ako, kag kabay nga ang Dios magpamati sa inyo! Sang una anay, ang mga kahoy nagtipon sa pagpili sang isa ka hari para sa ila kaugalingon. Nagsiling sila sa kahoy nga olibo, 'Maghari ka sa amon.' Ang kahoy nga olibo nagsabat, 'Kinahanglan nga bayaan ko anay ang akon lana, nga ginagamit sa pagpadungog sa mga dios kag mga tawo, agod maggahom sa inyo.' Ang mga kahoy nagsiling sa kahoy nga higera, 'Kari ka kag maghari sa amon.' Pero nagsabat ang kahoy nga higera, 'Kinahanglan bayaan ko anay ang akon maayo kag matam-is nga bunga agod maggahom sa inyo.’ Gani ang mga kahoy nagsiling sa balagon sang ubas, 'Kari ka kag maghari sa amon.’ Pero nagsabat ang balagon sang ubas, 'Kinahanglan bayaan ko anay ang akon bino, nga nagalipay sa mga dios kag sa mga tawo agod maggahom sa inyo.' Dayon nagsiling ang tanan nga mga kahoy sa talungon, ‘Kari ka kag maghari sa amon.' Nagsabat ang talungon, 'Kon Iuyag gid ninyo nga ako ang iyo manginhari, kari kamo kag magpasilong sa akon landong. Kon indi kamo, magagwa ang kalayo sa talungon kag magasunog sang mga sedro sa Libano.'”

Salmo sa Pagsabat:

Mga Salmo 21:2-3, 4-5, 6-7

(S) Nagakalipay ang hari, O Ginoo, kay ginhatagan mo sia sing kusog.

Ginhatag mo sa iya ang iya naluyagan, ginhatag mo ang iya ginapangayo. Gindalhan mo sia sang madamo nga mga kaayuhan, kag ginkoronahan mo sia sing bulawan. (S)

Nagpangayo sia sang kabuhi, kag imo sia ginhatagan; kabuhi nga malawig kag wala sing katapusan. Tungod sang imo pagbulig daku ang iya himaya, ginhatagan mo sia sing kadungganan kag pagkahalangdon. (S)

Ginahatagan mo sia sing mga kaayuhan sa gihapon, kag ang imo pagpakig-upod nagahatag sa iya sing kalipay. Ang hari nagasalig sa Labing Mataas, kag tungod sang mapinadayunon nga gugma sang Ginoo manginhari sia sa walay katubtoban. (S)

Aleluya:

Hebreo 4:12

    Ang pulong sang Dios buhi kag gamhanan, kag ini nagatungkad sang mga panghunahona kag mga handom sang tagipusoon sang mga tawo. 

Ang Pagbasa sang Santos nga Ebanghelyo suno kay:

San Mateo 20:1-16

   “Ang Ginharian sang langit kaangay sang isa ka tag-iya sang talamnan sang ubas nga naglakat sang aga pa gid sa pagpangita sing mga manug-obra para sa iya talamnan. Nagsugot sia sa pagbayad sa ila sa minimo nga suhol sa isa ka adlaw kag ginpadala niya sila sa pag-obra sa iya talamnan sang ubas. Sang mga alas nuwebe sa aga nagkadto sia sa merkado kag nakita niya nga may mga tawo nga nagatilindog didto nga wala sing obra. Gani nagsiling sia sa ila, ‘Mag-obra man kamo sa akon talamnan sang ubas, kay suholan ko kamo sang nagakaigo.’ Gani naglakat sila sa pag-obra. Amo man ang ginhimo niya sang mga alas dose kag sang mga alas tres sa hapon. Sang mga alas singko na sa hapon nagkadto naman sia sa merkado kag may nakita pa gid sia nga nagatilindog didto, kag nagpamangkot sia sa ila, ‘Ngaa bala nagatilindog lang kamo diri sa bug-os nga adlaw nga wala sing obra?’ Nagsabat sila, ‘Ti, anhon mo kay wala man sing may nagpaobra sa amon.’ Nagsiling sia sa ila, ‘Kon amo ina, kadto man kamo kag mag-obra sa akon talamnan sang ubas.’

   “Sang sirom na, nagsiling ang tag-iya sang talamnan sang ubas sa iya enkargado, ‘Tawga ang mga manug-obra kag suholi sila halin sa mga naulihi gid nga nag-obra tubtob sa mga nahauna.’ Ang mga nag-ulobra sugod sang alas singko sa hapon ginbayaran sang minimo nga suhol. Sang suholan na ang mga nahauna nga nag-ulobra, naghunahona sila nga daku ang ila mabaton, pero ang tagsatagsa sa ila ginhatagan man sang minimo nga suhol. Ginbaton nila ang ila suhol, ugaling nagkulomuron sila batok sa tag-iya, nga nagasiling, ‘Ining mga naulihi nag-obra sing isa ka oras lang, pero kami nag-obra sa bug-os nga adlaw sa nagatagiti nga init, pero pareho lang ang imo suhol sa amon!’ Ang tag-iya nagsabat sa isa sa ila, ‘Abyan, pamati ka! Wala ta ikaw gindayai. Indi bala nagkasugot kita sa minimo nga suhol? Karon, kuhaa ang imo suhol, kag magpauli. Akon ini luyag nga suholan ining naulihi pareho sa imo. Indi bala ako makapagusto kon ano ang himuon ko sang akon kuwarta? Ukon nahisa ka bala kay maalwan ako?’ ”

   Kag si Jesus nagsiling pa gid, “Gani ang mga naulihi mauna, kag ang mga nahauna maulihi.” 

Agosto 20 | Agosto 22